കൗമാര കേരളത്തിന്റെ കായികകുതിപ്പു കണ്ട സംസ്ഥാന സ്‌കൂൾ കായികമേള ഇത്തവണ അതിഗംഭീരമായി പൂർത്തിയായി. ഗെയിംസ്‌, അത്‌ലറ്റിക്‌സ്‌ ഇനങ്ങൾ ഒരേ വേദിയിൽ അരങ്ങേറിയ ആദ്യ പതിപ്പ്‌ അത്യന്തം ആവേശകരമായ അനുഭവമാണ്‌ സമ്മാനിച്ചത്‌. നീന്തലിലും ഗെയിംസിലും മുന്നിലെത്തിയ തിരുവനന്തപുരമാണ്‌ ഓവറോൾ ചാമ്പ്യൻമാർ. അത്‌ലറ്റിക്‌സിൽ മലപ്പുറം ഒന്നാംസ്ഥാനം നേടി ചരിത്രമെഴുതി.
കേരളത്തിന്റെ കായികഭാവിയിൽ സുപ്രധാന പങ്കുവഹിക്കാൻ പ്രാപ്‌തരായ നിരവധി പ്രതിഭകളെ മേളയിൽ കാണാനായി. നമ്മുടെ കായിക ഭാവി ശോഭനമാണെന്ന്‌ തെളിയിക്കുന്ന പ്രകടനമായിരുന്നു കുരുന്നുകളിൽ നിന്നുണ്ടായത്‌. ജി വി രാജ, കണ്ണൂർ തുടങ്ങിയ സ്‌പോട്‌സ്‌ സ്‌കൂളിലെ കുട്ടികൾ ഇത്തവണ മികച്ച പ്രകടനമാണ്‌ കാഴ്‌ചവെച്ചത്‌. ഗെയിംസ്‌ ഇനങ്ങളിൽ സ്‌പോട്‌സ്‌ സ്‌കൂളിലെ കുട്ടികൾ കൂടുതൽ ശ്രദ്ധേയരായി.
സ്‌കൂൾ കായികമേളയിൽ പങ്കെടുത്ത മുഴുവൻ കായികതാരങ്ങൾക്കും മികച്ച രീതിയിൽ മേള സംഘടിപ്പിച്ച വിദ്യാഭ്യാസ വകുപ്പിനും അഭിനന്ദനങ്ങൾ.